A joer, s’est asis à un baron Angres.[1]
Si frere sont assis [amont] par lo palais,[2]
Lor nevos enseignerent, tuit i sunt à .i. fes.
Quant Dex dona la nuit et li jors fu reles,
Donc vont à saint Victor ò veillerent hu[i]mes.
A Saint Germain des Pres vont li baron premiers,[3]
Cele nuit i veillierent trestote nuit en pes.
Uns esvesques chanta, Guillemes de Rohez ;[4]
Il est de lor lignage ò a maint de mauves.[5]
De cà à saint Victor ò il a gent ades,
Chanta Torpins de Rains belement et en pes.
Molt i ot pers et contes, à l’offrande ot grant fes.
Ce fu .i. samedi que il sont acesmé,
Renaus fu el palais, o lui maint avoé.[6]
Charles en apela Olivier lo membré,[7]
Duc Naimon et Ogier et Berart l’aduré,
Richart de Normendie, Huidelon l’alossé,
Et Yvon et Yvoire ò molt ot de fierté.
« Seignor, ce dist li rois, or oies mon pensé.
Vos iestes tuit mi home et plevi et juré,
Or comant à cascun sor sa crestientei
Que vos gardeis lo [champ] en droite loiauté,[8]
Que l’en ni face tort ne nule crualté.
Par icele querone don ge sui coroné,
S’il en i avoit .i. qui à tort fust mené,
Ge cuit que il seroit cherement comparé.
Vos passeres tot oltre avec elx ens el pré,
Si porteron les sains do [ber] saint Honoré. »[9]
« Sire, dient si home, à vostre volanté ;
Vostre droit maintenrons, si com l’avons usé. »
« Baron, dist Charlemaigne, or aves bien parlé.
- ↑ 17041 A Gervais.
- ↑ 17042 A se desduient. L a mlt.
- ↑ 17046 L humes. A huimaiz.
- ↑ 17048 A La messe lor chanta li evesque Gervais.
- ↑ 17049 A Il est de lor lignage, tant il fu plus mauvais.
- ↑ 17054 L P Renaus. A li rois.
- ↑ 17055 P même liste. A : Rolant, Naimon, Ollivier, Ogier, Regnaut, Torpin.
- ↑ 17062 L cham. A champ.
- ↑ 17068 L ver.
