Rohars sailli en piés, si en vint vers Charlon.
« Sire, dist li traïstres, oiez que vos diron ;
Je sui pres del mostrer [Aymonet] et Yvon,
Renaus ocist mon pere par mortel traïsson.
S’il est telx quel desdie, nos li esproveron,
Et veez ci mon gage que nos abandonon.
Ha, rois, car lo prenes, ostages liverrons. »
« Par Dex, ce a dit Charles, folie chastion. »[1]
Adonc s’est escriés [Aymonnes] et Yvon :[2]
« Bons rois, car lo prenes, que nos vos en prion. »
« Volentiers, dist li rois, mais [n’i] voi de raisson. »[3]
Adonc a pris lo gage que il ni fist tençon.
Et Constans saut avant iriés comme lion.
« Par Dex, ce dist li [glous], l’autre frere apelon.[4]
.ii. freres contre .ii. en champ nos combatron. »
Charles a pris les gages don cil fist livroisson,
Puis demanda ostages de droit et par raisson.
« Sire, font li traïtre, asses en liverron. »
Adonc sailli en piés li contes Guenelons,
Hardres et Barangiers, Estolz de Morillon,
Pinabiaux l’aveü, d’Autefuelle Grifons.
« Sire, dient li prince, et nos les plegeron.
Il son[t] de noz lignage, faillir ne lor devon. »[5]
« Seignor, dist Charlemaignes, nos les vos requeron.
Mais sachiez bien de voir, folie est l’atison.
Soi voz foiz les vos rent, issi com vos dison,
Que à cort les rendreis au jor que les metron. »
« Sire, font li traïstres, nos mielz ne demandon. »
Plegié sont li traïstres issi com vos oes.
[Aymones] et Yvon s’en sont au roi alés :[6]
« Sire, ves ci nos gages, defendre nos verres
Que Renaus nostre peres don sommes engendré