La lance porte droite don li aciers bien taille,
Un chevalier feri, son fort escu li taille ;
La broine li esmie, ne li vaut une paille ;
El cors li met lo fer, si li fant la coraille.
Charles a trait Joiosse qui reluit et bien taille,
Fiert un home Renaut qui n’e[s]t pas de frapaille,[1]
Tant souef l’abat mort que gaires nel travaille.
Charles crie : « Monjoie ! or avant ! Diez i vaille ! »
Li rois crie Monjoie [et fu bien esbaudis],[2]
[Il] fiert un chevalier deci que ens lo pis ;[3]
Atant i vint Rollans qui les a estormis,
Oliviers et Ogiers qui pas n’erent partis,
Et Naymes fu devant sor Morel l’arrabis,
Et tint bien la baniere, ne fu mie esbahis ;
Et tant i avoit gent, covert sunt li larris ;
Tuit escrient Monjoie, bien les ont envaïs.
Adonques i ot il un tel abat[e]ïs ;[4]
.m. chevaliers i ot qui getoient grans cris.
Quant Renaus [l’a veü], si en fu molt marris,[5]
Donc torna vers Tremoigne dolans et esbahis.
Vers Tremoigne torna li fors contes Renaus.
Ses homes [devant] mist, qui estoient molt chaut,[6]
Et il ala deriere, o lui Richars li baut,
Aalars et Guichars qui tant sevent d’asaut.
Quanqu’il fierent à cop, [si est mort sans defaut],[7]
Rollans les enchauça [cui procce ne faut].[8]
Richars de Normendie i vint plus que [le] saut ;[9]
Renaus, [li fils Aymon, le] fera ja touchaut.[10]
Or s’en ala Renaus qui n’ose remanoir ;
Dedens la cité entrent, qui ains ains à povoir,
- ↑ 14128 L et.
- ↑ 14131 L si feri par aïe. Bien corrigé par Michelant d’après M.
- ↑ 14132 L Et. M Il.
- ↑ 14139 Sic M.L abatis.
- ↑ 14141 Sic M. L manque.
- ↑ 14144 Sic M. L dedens.
- ↑ 14147 Sic A. L est mort sans arestal.
- ↑ 14148 Sic M. L cel que il fist chaut.
- ↑ 14149 Sic M. L les saut.
- ↑ 14150 L lo fil Aymon nos. Corrigé d’après le sens.
