Que se il velt mangier ne s’il est en desirre,
Si voist dedenz son tré, ne li ose desdire,
Et face son voloir, comme del suen meïsme :
Que se il donoit rien, on l’en tenroit à pire.
Quant Renaus ot son pere qui tot ensi parole,
Dont se leva en piez, n’a pas le ciere fole,
Puis [est] entré el tref, sanz nesune riole.[1]
De vitaille se kerke, que pres de lui acole,
Puis revint à la tor, sa gent tote saole
De pain, de vin, de car qui par la terre vole,
Quant il orent mangié tot belement, sanz foule,
Renaut ont mercié, n’i [a] nul ne l’acole.[2]
Errant s’en vont dormir sor bone quite mole ;
Et Renaus les gaita, tos tans fu en parole.[3]
Renauz gaita ses homes, n’en daigna reposer,[4]
Et il ont tout dormi desci à l’ajorner.
Quant il sont esvellié, lor cors font acesmer.
Quant il fu pries de none, s’asistrent au souper.[5]
Tant ont mangié iki, ne porent rien sauver ;
Tant ont de vin beü, n’en ont point au lever.[6]
Mort fussent là dedens, sanz nesun recovrer,
Se ne fust uns asaus, quant vint à l’avesprer.[7]
Cel jor furent laienz à malaise li ber.
Quant Dex dona la nuit, et on dut reposer.
Aymes fu à malaise, ne savoit où torner.
De ses enfans li membre, nes pooit oblier.
Sa mesnie apela où mielz se pot fier,
Et il i sont venu sanz point de l’arester.
« Baron, ce a dit Aymes, faites moi escouter.
Laiens sont mi enfant c’on m’a fait forjurer
Et il sont à malaise, nel pueent amender.
Se jes ai forjurés, il m’en doit molt [peser],[8]
- ↑ 13543 L entre el. M est entré ou tref qui avoit grant carole.
- ↑ 13548 L ni nul. M chascun Renaut acole.
- ↑ 13550 M qui fu en grant prigole.
- ↑ 13551 M et n’osa reposer.
- ↑ 13554 M disner.
- ↑ 13556 M souper.
- ↑ 13558 L’attaque dont Aymes profite pour leur lancer des provisions. M n’a pas ce vers, ni le précédent.
- ↑ 13568 L penser. M peser.
