Errant entrent laiens, qu’il n’i ot faite force.
Li baron sunt venu, nes un n’i remanoit.
Quant li rois l’a veü, durement li plaisoit,
Dont se leva li rois et hautement parloit.
« Baron, dist il, oiez, raisons est et s’est drois
Que vos sacies trestuit, ainz que vos en issoiz,
Por quoi vos ai mandez à mon consel destroit,
Assis ai Montalban, si l’ai mis à estroit.
Pendre volrai Renaut et metre en mon destroit
Et Allart et Guichart et Richart au cors droit.
Par icel Dameldeu qui haut siet et loing voit,
Ne lairoie por rien, cascuns pendus ne soit. »
Quant Naimes l’a oï, vers terre se clinoit :
Rollant et Olivier et Torpin en pesoit,
Et molt en faut petit ke Ogiers ne ploroit ;
Et par desor les autres à Aymon en pesoit,
Qu’il erent si enfant, engenrés les avoit ;
Mais par la force Charle ki ses sires estoit,
Les avoit forjurez en si malvais endroit,
Que jamais, en sa vie, jor ne lor aideroit,
Ne del sien rien n’auroient n’a elz ne parleroit.
Manecier les oï à morir à destroit,
Dont en fali petit, li cuers ne li crevoit.[1]
Vers le roi regarda, adonques le huçoit :
« Sire, vos aves tort, poi i gardes à droit. »
« Aymes, or vos taisies, je vœl que ensi soit.
Mar ocist Bertelai ki en pes me servoit. »
Carles fu en estant devant son pavellon ;[2]
Hautement a parlé, iriez comme lion,
Et li rois a parlé hautement, à cler ton :
« Baron, or entendes, si laissiez la tençon ;
Que par icel Segnor ki vint à passion,
Ne lairoie por home de nule region
Que Renaus ne fust mis à grant destrucion.
Il a passé .i. an que assis les avon ;
Onques n’i assaillimes, ne feïmes tançon,
