« Voire », ce dist Rollans qui tant fist à proissier.
« Baron, franc chevalier, ce lor a dit Ogier,
Dex l’a fait por Renaut que il velt apaisier.[1]
Trop a duré la guerre, des or fait à laissier.
Mort en sunt en bataille .m. prisié chevalier. »
Ensi s’en vont parlant, n’i font nul atargier,[2]
Et vienent en la cambre painturée à ormier,
Et virent Charlemaigne l’enperere au vis fier,[3]
Où se dort fermement, ne n’a soin d’esvellier,[4]
Encor ardent li cierge desus le candelier
Que Maugis i ot mis, quant il l’i ot colcié.
Quant or virent François si le roi endormi,
Molt s’en vont merveillant, si s’en sunt esbahi ;
Rollans parla premiers, li bons vassaus hardis.
« Où est Maugis, dist il, ki esploitié a si ?
Renaut, car le mandes ; je vœl qu’il viegne ci.
Le roi esvellera, k’il nos a amuï ;
Puis li irez au pié, crierez li merci.
Si vos pri, beax amis, por Deu ki ne menti.
Se vos le roi avez en vostre prison ci,
Que vos ne soies ja por ce plus orguelli. »
« Avoi, sire Rollans, Renaus li respondi,
Ja ne dira li rois : ainsi ert ne ainsi,
Nel face volentiers, del tot me met en li,
Mais que nos aions pais, et si soions ami. »
« Bien dites, dist Rollans, et Naimes autresi ;
Mais or queres Maugis, je cuit qu’est endormi
Por le travail d’anuit dont a tant consenti. »
Renauz s’en est alés, ses barons lassiez a
Et entre en une cambre où trover le cuida ;
Mais il n’i estoit mie ; atant si retorna,
Si en vint en la sale, par tot le demanda.
Et li portiers li dist, por noiant le querra :
« Anuit, à mienuit, là defors en ala ;
Puis revint assez tost, ne sai qu’il aporta
