« Maugis, ce dist Renaus, de cest castel penses. »
« Sire, ce dist Maugis, volentiers et de gré.
Dormez seürement, il sera bien gardé,
Et je irai Charlon ainz mienuit enbler. »
Quant Maugis dut aler dormir et reposer,
[Quant vint à mienuit, que tout est asserés],[1]
Venus est à l’estable, s’a Baiart ensielé ;[2]
Estroitement le cengle, s’a le poitral fermé.
Venus est au portier, si l’en a apelé :
« Diva, œvre la porte, lai moi là fors aler.
Tu auras mon mantel, quand j’ere retorné. »
Cil li œvre la porte, et sel commande à Dé.
Et Maugis s’en torna, si vint au maistre tré.
Il comence son carme : ses a si encantez
Qu’il ne desisent mot por les membres coper.
Maugis vint à Charlon, droit au lit où il ert ;
A son col l’encarja, o lui l’en a porté.
Charles ne pot parler ne .i. sol mot soner.
Maugis vint à Baiart, es archons l’a posé ;
Puis est saillis derriere, atant s’en est tornés.[3]
Venus est à la sale, s’avale les degrés.
En .i. lit cordeïs colça Charlon soef ;
Devant lui aluma .i. grant cierge enbrasé ;
Molt a le roi de France servi et honoré.
Et Maugis s’en torna, en la cambre est entré ;
Venus est à Renaut, si l’en a apelé :
« Dites, sire Renaut, velliez vos ou dormes ? »
« Nenil ce dist Renaus, Maugis et donc venes ? »
« Sire, ce dist Maugis, ja n’orres verité.
Que li donries vos, Renaut, par amisté,
Qui vos rendroit Charlon, le fort roi coroné ? »
« Par foi, ce dist Renaus, ne sauroit demander
Que je ne li donasse volentiers et de gré. »
Page:Castets - La Chanson des quatre fils Aymon, 1909.djvu/695
Le texte de cette page a été corrigé et est conforme au fac-similé.
667
les quatre fils aymon
