Dist Richard li vaillanz : « Renaut, quel le feres ?
Car vestons les hauberz, alons nos adouber,
Si alons assaillir as loges et as trés.
Quant si pres sunt venu, bien doivent comparer. »
« Richart, ce dist Renaus, tot ce laissiez ester.
Nos en ferons Rollant tote sa volenté. »
Quant li mangiers fu pres, si font l’eve corner.
.iiii. cors à haut ton font et palais soner,
.x. grailes menuiers por la gent aüner,
Et François les entendent des loges et des trez.
« Baron, ce dist li rois, nos somes encanté. »
« Voire, ce dist Torpins, bien sunt aseüré.
Cascun jor perdons nos, rien n’avons conquesté. »
Galeran de Bullon a Charles apelé :
« Vos garderes mes loges, mes hernois et mes trés ;
S’aserrons au mangier et vos nos garderez
Les portes del castel à .iiii.m. armés,
Qu’il ne viengnent sor nos poignant, parmi les prés. »
« Sire, dist Galerans, si com vos commandez. »
Renaus sist au mangier et Aallart li bers ;
Joste lui sist Rollans qu’il tient en grant cierté.
« Sire niés l’emperere, dist Renaus, entendez.
Ne fust por vostre amor, nos alisienz as trez. »
« Sire, ce dist Rollans, tot ce laissiez ester.
Jamais Charles de France nul jor n’ert confortés.
Dus Name, dist Rollans, vos i covient aler,
Entre vos et Ogier et Torpin l’ordené ;
Et dires à mon oncle, Charlemaigne au vis cler,
Encor me tient Renaus çaienz en grant cierté,
Que il ne m’a en fers ne en buie enserré ;
Mais se il se voloit paier et acorder,
Renaus se renderoit et Allars li ber ;
Si seroient si home et plevi et juré ;
Montalban li rendroient, la maistre fermeté. »
« Ne sai, dist li dus Names, se oserons aler. »
« Oïl, dist Aallars, ne mie ne vos het. »
Cil montent es chevaz, si sunt aceminé.
Il sunt issu des portes, s’ont le pont avalé.
Charles sist au mengier et ses rices barnés.
Page:Castets - La Chanson des quatre fils Aymon, 1909.djvu/693
Le texte de cette page a été corrigé et est conforme au fac-similé.
665
les quatre fils aymon
