Et Aallart li quens et Torpin l’ordenés.
Estous, li fius Œdon qui est vaillans et ber.
« Et nos irons à Charle por le congié rover. »
Et il li respondirent : « A vostre volenté.
Prenes vaillant conduit, que ne soions blasmé. »
Il montent es chevaus corants et abrivés.[1]
Oies de Pinabel comment il a ovré.
Quant il a nos barons veüs et escoutés,
Venus est [el] chemin, si s’est acheminés.[2]
Où qu’il vit l’emperere, prist l’en à apeler :[3]
« Sire drois empereres, je weil à vos parler.
Ci vient li quens Renaus et Aallars li ber,
Là fors sunt descendu sos .i. arbre ramé,
Et Ogiers vint apres por trives demender,
Por amener Renaut devant vos en vo tref. »
« Est ce voir ? dist [li rois] ; gardes nel me celes. »[4]
« Oïl, ce dist Piniaus, si me puist Dex salver. »
« Hé Dex ! dist l’empereres, en soies aorés.
Or prendrai jou venjance des traïtors mortés,
Par cui je sui en terre durement avilés. »
« Olivier, ce dist Charles, ales vos adober.
Et .ccc. chevaliers ensemble o vos prenes.
Se Renaut me poes prendre ne delivrer,
A toujors mais aures et m’amor et mon gré. »
« Sire, dist Oliviers, à vostre volenté. »
Il ont prises lor armes, si se sunt acesmé,
Et meïsmes Rollans est awec aus alés.
« Seignor, dist Charlemaignes, coiement vos tenes.
Passes à Balencon, le chemin eskives ;
Par derrier Montauban derriere lor venes.
Se Renaus a Baiart, il ne doute home né. »
Lors s’en tornent li conte, n’i ont plus aresté.
Or pent Dex de Renaut par la suie bonté
Et de sa compaignie qui o lui sunt remeis ;
Car se cist les sosprennent, il seront malmené.
Page:Castets - La Chanson des quatre fils Aymon, 1909.djvu/676
Le texte de cette page a été corrigé et est conforme au fac-similé.
648
les quatre fils aymon
