Et s’ai nostre cousin Maugis ci amené. »
Quant cil l’ont entendu, Deu en ont aouré.
« Cousins, dist Aallars, où fustes vos remés ? »
« Par foi, ce dist Maugis, bien le vos sai conter.
Quant je alai aider l’aigle d’or à lever,
Je me remeis tos seus, s’alai lancer as trés ;
Puis m’en voloie arriere à Balençon passer,
Quant Olivier le conte me covint encontrer.
Illuec me retint il, ne m’en poi delivrer ;
A Charlon me rendi, qui ne me pot amer.
Or ai tant esploitié, la merci Dame Dé,
Que je sui de sa main sains et saus eschapés. »
« Cousins, dist Aallars, Dex en soit aorés. »
Or en vont lor chemin li baron naturel,
Baut et lié et joiant, quant Maugis ont trové.
Tot droit à Montauban ont lor cemin torné.
Molt fu grande la joie, quant il i sunt entré.
La dame vait Maugis baisier et acoler.
Quant vienent au chastel, si font l’ewe crier,
Et manjuent ensamble par molt grant amité.
Quant il orent mangié, si fu près d’ajorner,
Puis alerent .i. poi dormir et reposer
Entreci k’au demain que il fu ajorné,
Que Renaus se leva, li jantis et li ber,
Et vint en une place là où Aallars ert,
Et Richars et Guichars où jooient as dés ;
Et Maugis et Richars i sunt andui alé.
« Seignor, ce dist Renaus, vostre eschac nos monstres. »
Richars fait l’aigle d’or devant lui aporter ;
A molt grande merveille le courent esgarder.
« Par foi, ce dient tuit, cist fait molt à loer. »
« Ci a molt vaillant aigle, ce dist Renaus li ber.
Où metrons nos cest aigle qui ci est aportés ? »
« Là mont, sur cel pomel, ce dist Maugis li ber,
Que on le puist veoir des loges et des trés. »
Lors l’ont fait amont metre et molt bien seeler[1]
- ↑ 11778-11779 Vers omis par Michelant.
Texte de Metz :
Par mon chief, dist Renaus, cist consaus iert greés,
