« Cousins, jou n’en poi mais, si me garisse Dex.
Je sui ci des er soir que il fu avespré ;
Et se jou vos veïsse amener fors des trés,
Certes, ains me soufrisse ocirre et afoler
Que ne vos rescousisse à mon branc aceré. »
Renaus descent à terre de Baiart où il ert,
Maugis a fait molt tost en la sele monter.
Renaus monta derriere, li vasaus adurés,
Et a dist à Maugis : « Qu’est çou que vos portes ? »
« Par foi, ce dist li leres, jel vos dirai asses.
C’est la couronne Charle, le fort roi coroné,
Et Joieuse s’espée au poing d’or noelé,
Durendal le Rollant dont il fu adobés ;
Et si ai l’Olivier qui molt fait à loer ;
Si ai Cortain l’Ogier, ne la voil oblier,
La Torpin l’arcevesque, dont li pons est dorés. »
« Par foi, ce dist Renaus, vos aves conquesté :
Mais d’une chosse faites durement à blasmer,
Que vos d’Ogier presistes le bon branc aceré. »
« Sire, ce dist Maugis, je le fis tot de grè.
Et que deïssent ore trestot li .xii. per,
Si j’eüsse lor brans awec moi aportés
Se je l’Ogier n’eüsse awec tot autretel ?
Tost se preïssent ores à lui por ramprosner.
Ne weil pas que Ogiers en soit de nul blasmés. »
« Cousins, ce dist Renaus, molt aves bien ovré.
Ainc plus sages de vos ne fu el mont trovés. »
Or s’en torne Maugis et Renaus li senés ;
Le bos de la Serpente prennent à cheminer.
Là encontrent Guichart et Aalart l’ainsné,
Et Richart ensement, qui molt iert esgarés.
A tant es vos Renaus et Maugis l’aduré ;
Renaus lor demanda : « Seignor, et dont venes ? »
« Sire, de Montauban où nous fusmes remés.
Nos vos alions querre, durement esgarés. »
« Si g’ere, dist Renaus, or m’aves vos trové ;[1]
- ↑ 11742 Michelant : Si g’erre, ce dist Renaus, une syllabe de trop. Dans L on a écrit d’abord Signor, puis corrigé Si g’ere, semble-t-il, mais en oubliant d’exponctuer ce.
