Page:Castets - La Chanson des quatre fils Aymon, 1909.djvu/667

639

les quatre fils aymon

11675Maugis a Durendal o le poings d’or letré.
Olivier de Viane, la vostre me monstres. »
Torpins regarde Ogier et Namlon le barbé ;
Chascuns de ces barons se prist à dementer,
Et dist li uns à l’autre : « Maugis a conquesté.
11680Plus vaut çou qu’il enporte que Paris la cité. »
Charles vint à l’aumaire que il vit desfermé,
Sa grant corone d’or n’i pot mie trover.
« Par mon chief, dist li rois, il s’en va bien loués.
M 308En la prison Maugis n’ai je riens conquesté. »
11685Se François sunt dolant, ne l’estuet demander,^[1]
Et Maugis s’en torna, si s’est acheminés.
Il laise le chemin que il devoit errer,
Et akiut une voie, si prent à galoper :
Ne s’y tenist à cors .i. mules sejornés ;
11690Et vint à Balençon, si a le fil passé.
Renaus fus desos l’arbre, correceus et irés ;
Il ne savoit conseil de Maugis l’alosé.
Baiars, li bons chevaus, a contremont gardé.
Il senti bien Maugis el chemin où il ert.
11695Baiars henit molt haut, et des piés a graté ;
Que Renaus weille ou non, est cele part tornés.
Li dus nel retint mie, ains l’a abandoné ;
Molt fu tost à Maugis venus et através.
Maugis le conut bien, quant il l’oï errer ;
11700Les .i. buison s’areste, s’a Renaut apelé :
« Qui estes vos, vasaus, qui cest cemin erres ? »
Et Renaus le conut, quant il l’oï parler ;
Lors a courus Maugis baisier et acoler.
« Cousins, ce dist Renaus, Dame Dex en ait grés,
11705Que des mains Charlemaigne vos voi or delivré. »
Par foi, ce dist Maugis, bien m’avies oblié. »

1. 11685 au lieu de ce vers Metz a :

   Que l’ore soit maudite que il fu engenrés.
   Peor ai que par nuit ne me viengne estranler.
   Li baron en ont ris, encor soient iré.
   Par mon chief, dist Rollans, biax oncles, droit aves.
   Or lairons des barons .i. petit à conter,
   Si dirons de Maugis qui s’est acheminés.