De Maugis no cousin onques ne vos doutes,
Car je cuit qu’i[l] est ja à Montauban ralés. »[1]
« Certes, ce dist Renaus, molt par est Maugis ber.
Onques mieudres de lui ne fu el mont trovés
Certes je ne volroie por .xiiii. cités
Que il fust mors ne pris ne de nos desevrés. »
Or dirons d’Olivier qui est dedans son tref ;
Il estoit descendus et Maugis autretel.
Des armes le desvestent li chevalier loé.
Oliviers fist Maugis richement acemer,
Puis a parlé à lui, si l’a araisoné :
« Vos voldres vos deduire con chevalïers loés,[2]
Ou vos vos deduirois come leres provés ? »[3]
« Sire, ce dist Maugis, onques mais n’en parles ;
A loi de chevalier me voldrai demener.
S’on me devoit ardoir et la poudre venter,
Si me deduiré je com chevaliers loés.
Lonc çou que li hom est, si gart sa digneté. »[4]
« Par foi, dist Oliviers, vos le m’afierez
Que vos come prisons loialment vos tenres. »
Et Maugis li respont : « Si com vos commandes. »
Il li a fiancié toute sa volenté.
.i. mentel d’escarlate ont Maugis afublé ;
En .i. lit cordeïs l’ont colchié molt soef.
L’empereres de Rome fu venus à son tref ;
Si se fait à ses homes maintenant desarmer.
De son chief li deslacent le vert helme jemé ;
Del dos li ont osté le blanc hauberc safré.
Plus de .vii. fois se pasme de duel et de vilté.
Il mande duc Namon et Torpin l’ordené,
Gondebuef de Vandueil lui et Milon d’Angle[r],
Estout le fil Œdon et Salemon le ber,
Richart de Normendie, le conte Guinemer.
Page:Castets - La Chanson des quatre fils Aymon, 1909.djvu/653
Le texte de cette page a été corrigé et est conforme au fac-similé.
625
les quatre fils aymon