Renaus cria s’ensaigne Montauban à cler ton,
Aallars Vairepane et Guichars Valençon.
Richars cria Dordone, qui estoit en l’estor,
Et Maugis point et broce, si vait ferir Sanson
Qui tenoit Pierefrite et si tenoit Mascon. »
Son escu li perça et l’auberc li desront ;
Parmi le cors li mist la lance et le pignon.
Toute plaine sa lance l’abat mort de l’arçon,
Puis escrie s’ensaigne : « Feres avant, baron. »
Renaus en fiert .i. autre en l’escu à lion ;
Desos la boucle d’or li peçoie et confont
Et l’auberc de son dos li desmaille et desront,
Droit par miliu del cors li mist le confanon.
Mort l’abati à terre devant lui el sablon.
« Oltre, ce dist Renaus, à Deu maleïçon.
Mar acointates onques les puis de Monfaucon. »
Guichars feri le tiers, li fils au viel Aymon,
Tot le fendi li ber desi que el menton ;
Mort le trebuche à terre, onques n’ot raençon.
Aallars fiert le quart par grant aïroison ;
Ainc arme qu’il eüst ne li fist garison.
En .ii. moitiés li met le fié et le poumom.
Mort l’abati à terre par dejoste .i. perron ;
Puis se sunt encontré entre lui et Huon,
.i. chevalier del Maine, qui molt fu riches hom.
Grans cols se vont doner es escus au lion,
Que les pieres en volent, s’en ronpent li blaçon,
Et fausent li hauberc, si rompent li doublon.
Ainc ne les pot tenir ne çaingle ne arçon.
Toutes plaines lor lances s’abatent el sablon.
Atant es vos Maugis brochant à esperon.
Aallars iert relevés sor les piés contremont ;[1]
Illuec ont pris le conte, cel del Maine Huon,
A Montauban l’enmainent arriere ens en prison.
Molt fu grans la bataille et grans cols i fiert on.
- ↑ 10858 Aallars a une syllabe de trop, mais l’on pouvait continuer à l’écrire ainsi alors que l’on prononçait déjà : Allars. B Aalart ont levé. C se relieve. Si l’on corrige, on prendra une de ces leçons.
