Et escrie Richart, le fil au viel Aymon,
Qu’il cuidoit que ce fust Ripeus de Ribemont :
« Si m’aïst Dex, Ripeu, vos estes malvais hom
Malvais garant aures en vo seignor Karlon.[1]
Hui perdres cele teste, ja n’aures raençon.
Mar i aves pandu Richart, le fil Aymon.
Dont ne vos di je bien, dedans le paveillon,
Se vos le pandies, k’en auries gerredon ! »[2]
Il a traite Cortain qui tranche de randon,
Et vost ferir Richart parmi son helme amont,
Quant Richars li escrie clerement à haut ton :
« Merci, cousin Ogier, por Deu et por son nom.
Et ja sui je Richars, li fius au viel Aymom.
S’avons pandu Ripeu, nostre anemi felon,
Bien m’a vengié Renaus et Maugis li larron ;
Mais je me vieng monstrer à vos et as barons
Que je suis delivrés, merci Deu et ses nons. »
« Vos mentes, dist Ogiers, Ripeu de Ribemont.
Si n’en ires vos mie par vo grant traïson
Que ne perdes la teste sos cel hiaume reont. »
Quant Richars entendi Ogier le poingneor,
Ne fu mie merveille s’adonques ot paor.[3]
« Por Deu, cousins, fait il ne me conissies vos ? »
« Nenil, ce dist Ogiers, si m’aïst saint Simon.
Je voi ci la baniere Ripeu de Ribemont,
Son hauberc et son helme et son escu à flor ;
Si voici le destrier qu’il ot à Monfaucon. »
« Ce fis je, dist Richars, por apercevoison. »
« Par foi, ce dist Ogiers, veoir veil ta façon. »
Atant deslace l’elme Richars, li fius Aymon ;
Quant Ogiers l’a veü, bien conut le baron.
- ↑ 10730 Manque à B.
- ↑ 10734 B guerredon.
- ↑ 10748 J’aurais dû déjà noter combien le trouvère laisse à leur rang les héros de la tradition. Renaud seul peut tenir tête à Roland et Ogier. Maugis lui-même n’hésitera pas à rendre son épée à Olivier. S’il faut faire une exception pour Charlemagne, je crois pouvoir l’expliquer en admettant que le roi des Fils Aymon tient plus d’un prince mérovingien que du chef de l’armée de Roncevaux.
