Molt par deves amer Rollant le poigneor,
Ogier de Danemarehe, Estot le fil Œdom,
Richart de Normendie, le baivier Widelon ;
L’arcevesque Turpin, Olivier le baron ;
A Charle se mellerent dedans son paveillon.
Renaut, ce firent il trestot por vostre amor,
Onques ne fu tex deus veüs en tot le mont,
Com demainent en l’ot li nobile baron ;
Bien cuident que me pande Ripeus de Ribemont.
Dones moi le congié, et nos vos en prion,
Que je puisse monstrer Ogier le poigneor,
Ydelon le baivier, Estout le fil Œdon,
Que je suis eschapés sains et saus de prison.
Onques ne fu tel joie com il en demenront. »
« Par foi, ce dist Renaus, Ogiers fist que preudon.
On doit amer le sien, quant ce vient au besoing.
Li jors est abaisiés et li solaus escons,
Je me dout molt de vos s’ales as paveillons ;
Mais je vos baillerai .iiii. mil compaignons,
Adobés de lor armes sor les destriers gascons ;
Et je remanrai ci en cel brueilluet reont,
Et je et Aallars et Maugis li larron
Et Guichars, vostres freres, à .x.m. compaignons.
Si porteres Bondin, mon cor, ensamble o vos,
Sel sones hautement, se vos aves besoing. »
« Sire, ce dist Richars, isi bien l’otrions. »
Cil se vont adober, qui ovec lui iront ;
Il vestent les haubers, lacent helmes reons,
Et çaignent les espées as senestres girons.
Et monterent es seles des auferrans gascons,
Et pendent à lor cols les escus as lions,
Et ont es grosses lances fermés les confanons,
Et or s’en vont ensamble, et Richars devant tous.
Renaus les comanda au cors sain[t] Lazaron,[1]
Et Richars s’achemine droit vers les paveillons.
Si porte la baniere Ripeu de Ribemont ;
- ↑ 10690 L. sains.
