Quant il vint au chemin, si akiut .i. troton,
Ne s’i tenist à cors .i. mulet arragon.
Le bos de la Serpente traversa à bandon ;
Onques ne tresfina, si vint à Colençon.
Renaus estoit as estres et Aallars li blons[1]
Et Guichars et la dame et li .ii. enfançon.[2]
Renaus garda sor destre par devers Colençon ;
Si a veü Maugis venir de grant rendon.
Quant Renaus l’aperçoit, à poi que il ne font ;
Plus de .vii. fois se pasme par desus le perron.
- ↑ 9785 L M as estres. B iert as fenestres.
- ↑ 9786-9787 manquent à B M.
A ichele parole va le bourdon lever,
Fiert l’un des escuiers sans point de demourer,
Merveilleus cop li donne, ne vous kier à cheler,
Del keval l’abat mort qui qu’en doie peser.
Quant li autrez le voit, prist soi à effraer.
Il broche le cheval, qu’il s’en cuida aler,
Et Maugis le saisist qui bien le sot combrer.
Il hauche le puings destre, si li donne .i. cop tel.
Tout estendu le fait du cheval enverser.
Sur l’un des chevaus monte, et l’autre va combrer.
Tout droit vers Montauban commencha à aler.
Oies de l’escuier qu’il fist jus reverser.
Quant il fu desdormis, sor sez piez va ester,
Son compaignon regrete, si commenche à plourer.
Fuiant s’en vint à logez quanquez il pot haster.
Quant Oliviers le voit, vers lui prist à aler.
Il le prist par le brach, se li a demandé :
Où sont ja mi cheval ? garde ne me cheler.
Par foi ! sire, fait il, bien le vous sai conter.
.i. paumier encontramez en che bois au passer.
Ains ne feïmez mot, si ot à nous jousté.
Mon compaignon a mort et moi fist craventer
De mon cheval à terre que me covint pasmer.
Tout droit vers Montauban se prist chil à aler,
Là mena vos chevaus, bien le puis affier.
Par foi, dist Oliviers, che me puet moult grever.
E Diex ! dist Kllem., com puis le sens derver !
Qui se porra jamais en nul homme fier !
Or lairons nous ichi du riche roy. Kll.
Si dirons de Maugis le nobile baron
Qui vint à Montauban, brochant à esperon.
Le bois de la Serpente trespassa à bandon.
