Qui ne daignies espié porter encontre moi.
Non ferai je vers vos, se Dex m’aïst et Fois. »
[L]ors geta son espié tres enmi le marois,
[E]t a prise une lance [dant] Girart l’espanois[1]
Et lait corre Baiart con chevaliers adrois.
Or en sera la joste, ne puet mais remanoir.
Grans cols se vont doner es escus vianois ;
Desos les boucles d’or les percerent manois.
[D]es haubers c’ont vestus desrompirent les plois
Et font les fers passer les les costes tos frois.
[Il] briserent lor lances et firent gran esfrois.
Se ce fussent espié, mort fussent ammedoi.
N’i ot si bon destrier cui l’eschine ne ploit.
Renaus abat Rollant tres enmi le chaumois.[2]
Ce ne vos di je mie, ne ne dirai des mois,
C’onques Rollans cheïst por conte ne por roi ;
Mais se li chevaus verse, et il pert ses conrois.
[D]ont n’en pot mais Rollans, s’il le covint chaoir,
Et li coins de son hiaume ficha el sablonoi.[3]
[Ne] ne vos di je mie, ne ne m’oes conter
C’onques Rollans chaïst por chevalier armé ;
Mais quant li chevaus verse et est desafeutrés,
[D]ont n’en [puet] mais [li hons], s’il le [convient] verser.[4]
Quant Rollans l’a veü, à poi n’est forsenés.
Il resailli en piés et trait le branc letré
[Et] vint à son cheval, le chief li vost coper.
Malvais roncin coart a son destrier clamé.
« Par icel saint apostre c’on quiert en Noiron pré,
A poi que ne vos fas cele teste voler,
Quant le cop d’un garçon ne poïtes porter.
Jamais n’aurai honor en cest siecle mortel. »
Renaus dist Rollant : « Tort aves, en non Dé.
Trop sunt François eschars à l’avaine doner.
Poi en ont li cheval, quant vient à l’avesprer ;
- ↑ 9137 M dant. Metz : à L manque.
- ↑ 9147 B ajoute : Et Renaus tresbucha trez enmi le marois.
- ↑ 9152 Sic L B. manque à Metz ; mais L le place après le vers 9150.
- ↑ 9156 L. Metz Dont n’en pot mais Rollans, si le covint verser. C’est simple répétition, B de même. J’ai préféré la leçon de M. On notera que beaucoup d’initiales sont rognées.
