Aves vos puis dormi, tant aves demoré ?
Or est grainde la perte, grant pechié i aves. »
Tantost com il se voient, si se vont ajoster,
Et François et Gascons les laissent assembler.
Il n’i a si hardi qui ost lance lever.
Chascuns s’en va as rens de la bataille ester
Por esgarder la joste des meillors bachelers
Qui ainc fussent en France ne el monde trové.
Ki donc veïst Estout et Salemon plorer,
Et Ogier le Danois et Torpin l’ordené.
Yidelon de Baivière a Estous apelé
Et Torpins l’arceveskes et Oliviers li ber :
« Ales ent à Rollant de par nos tous parler.
Si nos dites au comte qu’il ment sa loialté
Et s’il ocist Renaut, nos nel porrons amer :
Ains sera de nos tous orendroit desfiés.
Mais guerpisse l’espié por la nostre amisté
Et si prenge une lance, si voist a lui joster ;
Si le fiere .i. seul cop por sa foi aquiter. »
« Seignor, dist li Danois, tot ce laisies ester ;
Kar laisies les barons .i. petit esprover.
[Je sai bien com Renaus set ses armes porter].[1]
Cuidies vos que [il] soit [por nos] espoentés ?[2]
Nenil, par saint Denise, ja mar le cuideres.
Rollans sera molt las, ains qu’il en soit tornés.[3]
N’i volroit estre pris por .xiiii. cités.
Mais laisies les barons .i. petitet joer.
Je trovai ja Renaut sos Balençon, as gués.[4]
Il me dona tel cop sor mon escu listé,
N’i valust mes haubers .i. denier moneé.
Le cercle de mon helme vi el sablon torner. »[5]
« Ogier, ce dit Estous, car nos laisies ester. »[6]
Page:Castets - La Chanson des quatre fils Aymon, 1909.djvu/579
Le texte de cette page a été corrigé et est conforme au fac-similé.
551
les quatre fils aymon
