Lors escrie ses homes : « Ales, si vos armes.
Encui sera mes cors vers Renaut esprovés. »
François courent as armes, nus n’i est demorés.
Il vestent les haubers, lacent helmes gemés
Et çaingnent les espées as senestres costés,
Et montent es chevaus ferrans et pomelés
Et tienent en lor poins les fors espiés karrés.
Bien furent .iiii. mile, à tant les ont esmés.
Renaus, li fius Aymon, les a molt bien mirés ;
Aallart les monstra, qui estoit li ains nés,
Et Guichart et Richart et Maugis le sené.
« Seignor, ce dist Renaus, à moi en entendes.
Ves là François venir, bien les ai avisés.
Ja est çou li niés Charle, Rollans li adurés,
Et Names à la barbe, li sages, li membrés,
Et Ogiers li Danois et Torpins l’ordenés,
Estous, li fius Oedon, Salemons li senés,
Isacar de Monmor ki si est renomés,
Richars de Normendie ki tant est redoutés,
Et Morans de Riviers et l’Escoz Gilemers
Et Kenuz d’Engleterre, le plus biaus bacelers
Qui soit en Paiennime n’en la Crestienté.
Ce est la flors de France que avons encontré.
[Ce] ne sunt pas Lombart ne Anglois d’outre mer,[1]
Ains sunt li meillor prince que l’on puisse trover.
Or covient chascun estre hardi comme sangler ;
Si li covient molt bien de la lance joster.[2]
Or vos pri je, por Deu, que molt bien i feres ;
Car il nos est mestiers, issi con vos saves,
Que Rollans ne s’en puist à Olivier gaber,
Qu’il [ait les] .iiii. freres comme pastors trovés. »[3]
« Sire, dient si home, si con vos commandes.
Tot est en dame Deu, le roi de majesté. »
« Aallart, dist Renaus, à moi en entendes.
Faites nos de nos gens .vii. eschieles joster ;
En chascune si ait .m. chevaliers armés.
Page:Castets - La Chanson des quatre fils Aymon, 1909.djvu/570
Le texte de cette page a été corrigé et est conforme au fac-similé.
542
les quatre fils aymon
