Ydelon le Baivier qu’il vit les lui ester.
« Seignor, ce dist Rollans, plaist vos à escouter.
Seroit çou ja Renaus que je voi là errer,
Aallars et Guichars, ki tant font d’aus parler,
Et Richars li menor qui tant fait à loer ? »
« Oïl, dist l’arcevesques, ce sunt il li bon ber.
Il se font bien conoistre là où wellent torner.
Jamais sens joste faire n’en porrons eschaper. »
« Hé Dex ! ce dist Ogiers, toi en puisse aorer.
Voir ne fusse si liés, qui me vossist doner
.c. livres de fin or, autretant d’argent cler ;
Car or aura Rollans trestot son desirrer.
Si pora on veoir à Renaut esprover
S’i le prendra à force et Aallart le ber
Et Richart et Guichart qui molt font à amer,
Et Maugis le larron qui tant fait à douter,
Ki ne doute chastel ne mur à esfondrer. »
Quant Ogiers vit Renaut qui si vint abrivés,
Ne fust mie si liés por .m. [mars] d’or pesés.[1]
« Hé Dex ! ce dist Ogiers, tu soies aorés ;
Car or aura Rollans trestot son desirrer. »
« Rollant, ce dist Ogiers, soies aseürés,
C’or aures vos Renaut que vos tant desirres.
Certes molt en sui liés que encontrés l’aves,
Car or verromes nos comment vos [le] prendres.[2]
Maintes fois nos aura traveilliés et penés,
Certes, se il avient que vos vif le prenes,
Et vos tant voles faire que vos le me rendes,
Ja puis que je l’aurai, mar m’en responderes.
Bien le ferai lier ; estroit iert enserrés ;
A Charlon le rendrai, qui en fera ses sés.[3]
Si sera lor baras trestos par asomés. »
« Danois, ce dist Rollans, or ne me ramprones.
Par saint Denis de France, ains le vespre verres
Li ques chaplera miex de l’espée del les. »
