Ne je n’ai mie encore à mon seignor parlé ?
Contre sa felonie li doi rendre bonté.
Si le dist l’Escristure et li bon clerc letré
Que ensi le doit faire qui a le cuer sené.
S’il va el puis d’infer, je n’i weil mie aler.
Adobes vos, baron, ne soies demoré ;
Si secorrons le roi c’on ne l’en ait mené,
Car se Rollans l’enmaine, tost l’auroit vergondé. »
« Par foi, dist Aallars, tot sens moi i ires.
N’i porterai les piés ne n’i serai trovés. »
« Ne je, ce dist Guichars, si me garisse Dés. »
Dist Richars li petis : « Biau signor, si feres.
Puis que Renaus le weut, contredit n’i metes.
Ja n’i aura si riche que n’i coviengne aler. »
.iiii.m. Gascon li sunt au pié alé :
« Beneoite soit l’eure, Renaut, que fustes nés,
Que li vostres secors n’est mie demorés.
Nos vos rendrons Gascoigne et des chastiaus les cles ;
Si en seres tos maistres, sires et avoés.
Jamais nus autres rois n’i sera coronés.
Mais se François l’enmainent, ce sera grans vités ;
A vos et à vos oirs esteroit reprové. »
« Par foi, ce dist Renaus, vos dites verité. »
Atant a pris Bondin, si l’a .iii. fois soné.
Montauban en tentist environ et en lé ;
As armes sunt coru, n’i sunt plus demoré.
Renaus vesti l’auberc, laça l’elme jemé,
Et a çainte l’espée au senestre costé,
Et pendi à son col .i. fort escu listé,
Et saisi .i. espié par molt ruiste fierté,
A .v. claus de fin or le confanon fermé.
Li fers fu poitevins, tranchans et afilés.
Puis monta sor Baiart, ç’on li ot apresté,
Et si home s’adobent el palais seignoré.
De Montauban issirent et rengié et serré.
Bien furent .xx. millier quant furent assemblé,
Et bien .vii.c. archier as ars turcois dalés,
Ki ne fuiront por mort .i. plain pié mesuré.
Page:Castets - La Chanson des quatre fils Aymon, 1909.djvu/567
Le texte de cette page a été corrigé et est conforme au fac-similé.
539
les quatre fils aymon
