Fouques de Morelon i a perdu le cief ;
Jamais ne montera sor Morel son destrier,
Et .iii.c. chevalier que Charles avoit ciers.
Molt me hara li rois, s’auera droit, par mon cief ;
Tost me feroit li rois ardoir et graellier.
A vos me combatrai au fer de mon espié.
Cestes miels voil morir qu’ariere repairier.
Se tu me pu[e]s conquerre, si me cope le cief,[1]
Et se jo vos puis prendre, que Dex l’ait otroié,
Je vos rendrai à Charle, si me puist Dex aidier.
Jamais nus cosinages ne vos aura mestier. »
Com Renaus l’a oï, à poi n’est esragiés.
« Danois, je vos de[s]fi ; de mon cors vos gaities »[2]
« Et je vos ensement, » dist li Danois Ogiers.
Andui se desfierent li vallant chevalier.
Renaus broce Baiart des esporons d’ormier
Et Ogiers laise corre son bon corant destrier ;
La terre font croller li ceval soz lo[r] piés ;[3]
Grans demie loé[e] en dure li tempie[r]s
Et li fus et li fers en vole vers le ciel.[4]
Grans cos se vont doner es escus de cartier ;
Desoz le[s] bocles d’or les ont frais et perciés,
Et les haubers desos ronpus et desmailliés.[5]
A la force des bras et as corans destriers
Si sont entrecontré des fers et des aciers,
[Si angoisseusement por els miex embroier]
Que ronpent les sosceingles et fausent li poitrier,[6]
Que tres parmi les crupes des auferrans destriers[7]
Se sont entrabatu li vallant chevalier,
Et molt en faut petit k’i n’ont les co[l]s brisiés ;
Mais cascuns fu vasax et de corage fier.
Isnelement et tost resont venu en piés
Page:Castets - La Chanson des quatre fils Aymon, 1909.djvu/542
Le texte de cette page a été corrigé et est conforme au fac-similé.
514
les quatre fils aymon
