Page:Castets - La Chanson des quatre fils Aymon, 1909.djvu/540

Le texte de cette page a été corrigé et est conforme au fac-similé.
512
les quatre fils aymon

Donc enforce la noise et la grans chaploison.
Là veïssies François morir à grant dolor ;
Ne pueent mais sofrir le chaple ne l’estor.
7835Ogiers s’en va fuiant à coite d’esperon ;
Venus est à Dordone, ens se fiert à bandon.
Broiefort l’emporte oltre de merveilleus randon.
De l’autre part descent de la rive el sablon.
Li dus Renaus l’apele par contralioison.
M 207 7840« Ogiers, ce dist Renaus, estes vos pescheor ?
Se tu as pris anguiles ou troites ou saumon,
Fai m’ent tel compaignie, com doit faire frans hom ;
Ou tu passes cele ewe, si vien joster à nos.
Fius à putain, traïtres, lechieres, malvais hom,
7845Vo foi aves mentie à vo seignor Charlon.
Mes cousins deves estre, preis nos apartenom :
Envers trestot le monde deüssies estre o nos :
Ne nos aves aidié vaillant .i. esperon.
En gage nos laisies Fouque de Morillon
7850Et le conte Guimart et Fauc de Mongençon,
Et .ccc. chevaliers del barnage Charlon.
Mal dahaz ait Rollans et Oliviers li blons
Et Charles l’emperere, li rois de Monloon,
S’il ne vos pent encui com .i. altre larron. »
7855« Dex en soit aorés, dient li Borgoingnon
[Et François et Englois et Normans et Breton].[1]
Ogiers de Danemarce, or aves guerredon ;
Certes se volsissies, pris fussent li gloton. »
[Dont n’i volsist il estre por tot l’or de cest mont].[2]
7860Ogiers remaint tos seus axec .x. compaignons ;
Dame Deu reclama par son saintisme non.
« Hé Dex ! dist li Danois, biaus pere glorious,
Com ai male merite de tos mes compaignons !
C’est de bien fait col frait, ce conte le leçon. »[3]

7865Quant entent li Danois qu’il est contraliés,
Tel mal talent en a, à poi n’est enragiés.

  1. 7856 Pris de M.
  2. 7859 Pris de M.
  3. 7864 Metz ce chante la canchon. M Ch’est du bienfet qu’ai fet vers Renaut le baron.