Au retraire la lance, or oies grant dolor,
Li caï la boele sor l’ermin peliçon.[1]
Par la plaie li pert le foie et le pomon.[2]
A haute vois s’escrie li traïtes felon :
« Or sont descompaigni[e] li .iiii. fil Aymon ;[3]
Richart lor ai ocis, ki estoit li menor.[4]
Par ma foi, il n’ert mie li mains cevaleros,[5]
Ançois estoit li mieldres, fors Renaut l’orguelos.[6]
Tuit i seront [destruit et ocis] à dolor.[7]
Li rois les fera pendre ains le solel escons ;
Ja n’erent racaté por nul avoir del mont. »[8]
Qant Richars ot passée l’anguisse et la dolor.[9]
Et li gentis vassax revint de pamisson,
Il est salis en piés, n’i fist arestison,
Et empoigna la plaie de son ventre en son poing ;[10]
Ses boiax i rebote et lie à son giron,
Et a traite l’espée ki [trenche de randon] ;[11]
Vers Girart s’aproça et li dist par iror :
« Hé ! glos, ce dist Richars, menti aves del tot.
Ja n’en aura reproce Renaus, li fix Aymon,
Que ja Richars, ses freres, i soit ocis par vos. »
Il tint traite l’espée, haucie la contremon :[12]
Un entredeus li gete à guise de Breton ;[13]
Entre l’iaume et l’escu vint li cols de randon,[14]
La mance del hauberc ne li vaut .i. boton ;
Ains li trença l’espaule et le coste li ront
- ↑ 7132 Metz : Il saicha la boele.
- ↑ 7133 Metz : li foie et li polmon.
- ↑ 7135 L descompagni. Metz : descompaignié.
- ↑ 7136 Metz : Richardet ai ocis, cil estoit li menors.
- ↑ 7137 Metz : ce n’iert mie des mains.
- ↑ 7138 Metz : li meudres.
- ↑ 7139 Sic Metz. L ocis et pendu.
- ↑ 7141 Metz : ierent... nule riens.
- ↑ 7142 Metz : passé.
- ↑ 7145 Metz : et son ventre.
- ↑ 7147 Sic Metz. L li pent al gieron.
- ↑ 7152 Metz : l’espée nue, lance la contremont.
- ↑ 7153 Metz : à guise de baron.
- ↑ 7154 Metz : vint li brans de color.
