Faisons lor bons assaus à force et à bandon. »
Et il si firent sempres, sens nule arestison.
Plus de .lx. espiés lancerent as barons ;
Là les ont despartis, ou il weillent ou non.
Renaus s’en est partis tres par mi liu d’eus tous,
Et Aallars le siut à coite d’esperon.
Richars vint à poignant à la roche Mabon.
Desos Guichart ont mort son [mulet] arragon[1]
Et lui el cors navré de .ii. espiés parfont.
Illuec ont pris Guichart, ou il vossist ou non,
Et si li ont liés et les piés et les pons.
Li sans vermaus li file desi à l’esperon.
Or enmainent Guichart à guise de larron.
Hé Dex ! com il le batent et angoise li font !
Durement le menacent qu’il le rendront Charlon.
Encui sera pendus el pui de Montfaucon.
Renaus l’a entendu, à poi que il ne font ;
Et Guichars le regrete, ki molt ot grant peor :
« Ahi ! Renaut, biau frere, à Deu vos commendom.
Chastiaus de Montauban, jamais ne vos verron. »
Il plore tenrement et maine grant dolor.
Renaus a entendu les mos et la raison ;
Aallart en apele, son frere le greignor.
« Frere, ce dist Renaus, por Deu, don[c] n’oes vos[2]
Com Guichars se demente, li fix au vi[o]l Aymon ?[3]
Lairons l’en nos mener ou nos le soucorons ?
Certes ce seroit dex, se ensi le perdon. »
« Sire, dist Aallars, ne sai lequel façon.
Ne somes ci ke dui ki aidier nos puisson,
Et cil sunt molt grant jant qui l[e] mainent prison. »[4]
« [Hé] Dex ! ce dist Renaus, por ta redemption,[5]
Se Charles pent mon frere, jama[i]s n’auerai onor.[6]
Page:Castets - La Chanson des quatre fils Aymon, 1909.djvu/514
Le texte de cette page a été corrigé et est conforme au fac-similé.
486
les quatre fils aymon
