Li mendre tient .vii. liues à .i. errant à pié.
Prenes avenant jor qui mex face à prisier,
Par devant Montauban, droit enmi le gravier ;
Li soit Charles de France, o son barnage fier,
Et vos i seres, sire, sor Baiart, vo destrier ;
O vos seront vo frere, ki tant font à prisier.
Là soit la concordance del faire ou del laisier,[1]
Et soient owec vos .cccc. chevalier.
Si les aura Maugis, vos cousins, embuciés ;
Se besoing en aves, si vos vendront aidier.
Anuit [sonjai un] songe miravilleus et fier,[2]
Que g’estoie là sus, soz le tronc au paumier ;[3]
Del parfont bos d’Aguise, qui est grans et pleniers,[4]
Vi issir mil senglers del bos, tos eslaisiés,
Les dens hors de le geule, tranchantes com aciers.
Si vos voloient, sire, ocirre et destrancier.
Les tors de Montauban vi à terre plaisier ;
.i. karriaus descendoit del plus maistre sollier ;
Aalart consiuoit, vostre frere prisié.
Le destre bras del cors li vi je esracier ;
Li poumons et li foies li chaoit jus as piés.
Saint Nicol de Waucois revi je trebuchier ;
Les ymages ploroient des biaus iols de lor chief
Et .i[i]. aigles venoi[en]t amont devers le ciel,[5]
Ki prenoient Richart, le gentil chevalier ;
Si le pendoient, sire, à .i. fust de pomier.
Il escrioit : Renaut, car me venes aidier.
Vos i alies, sire, sor Baiart vo destrier ;
Mais desous vos chaoit li auferrans corsiers.
Vos ne li poïes secorre ne aidier.
Li songes est molt fort, j’en ai le cuer irié. »[6]
- ↑ 6481 L faires.
- ↑ 6485 L Anuit songe miravilleus. A sonjai un songe.
- ↑ 6486 L sor. M V soz.
- ↑ 6487 La forêt de Cuise.
- ↑ 6498 L .i. aigles venoit. Il faut un pluriel.
- ↑ 6505 Voici les principales formes du songe de Clarisse :
A —Ennuit sonjai un songe qui mont par estoit fier,
Que j’estoie laissus en ce palais plenier.
Je vi venir .v. ors corrans tous eslaissiez
