Si a chosi la mort Aelart et Guichart
Et Richart le menor et Renaut le vasal ;
Ne se puet atenir que des iols ne plorast.
S’il osast por le roi, volentiers le celast.
« Sire, ce dist li rois, nel me celes vos ja.
Que racontent les lettres que Charles envoia ? »
« En la moie foi, sire, ce li a dit Gontars,
Molt par est fors à lire ceste premiere pars.
Li clers fu nés de Frise qui le brief seela. »
Li chapelains fu sages et cortois et membrés.
La parole ne pot à son seignor celer.
A une part se trait, si l’a araisoné :
« Saves que mande Charles, li gentius et li ber ?
Se vos li faites çou qu’en vo brief a trové,
De .xiiii. chastiaus vos croistra l’ireté
Et si vos done en plege le roi de majesté
Et saint Denis de France, cui tient à avoé.
.iiii. mentiaus vos fait par vostre home aporter,
Trestot en tel maniere com aves devisé,
Que vos les fius Aymon feres el val aler ;
Que chascuns en ait .i. à son col afublé,
Qu’il ne weut que nus autres soit por eus agrevés.
Se les lettres ne mentent que ci vos ai conté,
Es plains de Vaucoulors sunt ja sa gent entré,
Fouques de Morillon et Ogiers li senés ;
Awec aus .iiii.m. de chevaliers armés.
Les fius Aymon atendent, que vos deves livrer. »
Quant l’oï li rois Yus, durement s’est hastés.
Il fist soner ses grailes, et sa gent fist monter.
A .ii.m. chevaliers issi de la cité ;
Desi à Montauban n’i ot reine tiré.
Par la porte Foucon sunt en la vile entré,
Cil chevalier porprennent par le borc lor ostes.
Li rois Yus de Gascoigne est el chastel entrés ;
Sa suer ala encontre, o le viaire cler ;
El le prist à la menche de l’ermin angolé ;
Si le voloit baisier, mais il ganchist le nes
Et dist, malades est, ne puet à li parler,
Por la grant felonie que il ot enpensé.
