« Diva ! cui cele vile de cele tor qarrée ?[1]
A i noient Renaus ne Aallars son frere ? »
« Nenil, dist li portiers, vallant une denrée ;
Ains est le roi Yon à la barbe melée.
Li dus de Monbendel à la ciere membrée,
Hermenfrois li cortois et Hue de Belquerre.
Cil gardent le castiel et la grant tor fundée. »
« Amis, ce dist dus Naimes à la barbe menlée,
Faites moi .i. mesage en cele tor quarrée
Et dites as barons, trives lor soit donée ;
Vienent à nos parler, si oront no pensée. »[2]
Li portiers s’en torna sans nule demorée,
Venus est à la sale ki haute est et pavée
Et trove le[s] barons, les testes enclinées,[3]
Ki ont veü Charlon o sa grant ost jostée.
Li portiers en apele dan Hue de Belquerre :
« Sire, dist li portiers, oies raison membrée.
Là defors a .iii. ostes de molt grant renomée.
Venes à els parler : trive vos [est] donée. »[4]
Qant li baron l’oïrent, onques ne s’aresterent ;
Venu sunt à la porte où li .iii. contes erent.
Le guicet font ouvrir, le[s] contes apelerent.[5]
« Qui estes vos, segnor ? » dist Hues de Belquerré.
Et cil ont respondu, sagement ont pallé :
« Nos somes home Charle qui est rois coroné.
Asise a vostre vile à son rice barné.
Venes à lui parler, trives vos a doné.
Ja n’i perdres del vostre .i. denier moneé. »
Comme cil l’ont oï, n’i ont nient demoré ;
Ains montent es cevas, ne se sont aresté
Desi au maistre tré, là ont Charlon trové.
Li rois en vint contre els, com cil qu’est bien séné.
« En la moie foi, sire, dist Risps de Saint Seré,
