Qu’en .iii. jors et demi est venus en Gascogne,
Tot droit à Montalban, sor l’eve de [Dordone].[1]
Or diromes del mes qui prist à esploitier,
Qui passa Balençon, le gués et le gravier,
Et vint à Montalban le castiel droiturier ;
Tos les degres en monte sus el pales plenier.
Renaus, li fix Aymon, ert levés del mangier
Et si frere ovec lui, que molt aime et tient cier ;
Si ont en lor compaigne .iiii. c. chevalier.
Atant es lor mesage que il lor vient noncier
Que li rois Charlemaignes doit sor els cevalcier.
[Quant] Renaus l’a veü, si le cort enbracier ;[2]
Ses bras li mist au col par molt grant amistié ;
Isnelement et tost de joste lui l’asiet,
Puis li a demandé : « Com as tu esploitié ?
Fus tu ou à Paris, à Rains ne à Poitiers ?
Comment se contient Charles, li rois ki France tient,
Li plus rice emperere que onques fust soz ciel ?
Unques mieldres de lui ne monta sor destrier.
A il pris Guiteclin et le regne essilié ?
Por Deu ne laira ja mes sire à ostoier.
Par Deu molt m’esmervel, ains ne l’en prent pitié. »
« Sire, dist li mesages, par [Deu le droiturier],[3]
Charles en a juré et sa barbe et son cief
Que il vos asaura à cest esté premier.
Devant vo maistre porte fera son tré ficier,
Vos castels et vos murs vos fera peçoier ;
S’aura en sa compaigne Rollant et Olivier,
Ysacar de Monmor et Morant de Rivier,
Estolt le fil Odon et le Danois Ogier,
Salemon de Bertaigne et le roi Desier,
Ricart de Normendie, le conte Manesier,
Sanson de Pierrefort, le comte Anegillier,
Le duc Tierri d’Ardane et Gondebuef le fier
Et Kanu d’Engleterre, le jantil chevalier ;
