Cist chevalier se lievent contreval la cité,
Li rois a le servisse par bon cuer escouté,
Puis en a apelé Sanson et Othoé :
« Ales desous Monmartre, de desous Saine, el pré,
Si portes ma corone à fin or esmeré,
.cccc. mars d’or fin ; ensi est devisé,
Et ovec seront mis .c. bon paile roé. »
Et cil li respondirent : « A vostre volenté. »
Tost et isnellement s’en sunt d’illuec torné.
La corone enporterent qui getoit grant clarté.
Par desor .i. estache ont .i. paile geté ;
Sus mistrent la corone et l’or qu’il ont porté,
Et li .c. paile furent galacien fresé.
Donc sunt aval Paris cil chevalier monté.
Là veïssies le jor maint destrier amené,
Sor et noir et baucent, ferrant et pomelé.
Et Renaus et Maugis en sunt au cors alé ;
Hé Dex ! com il i furent celui jor regardé !
Et Baiars va clochant, qui le piet ot noé.
L’empereres de France a Naimlon apelé
Et Ogier le Danois, Widelon le barbé :
« Prenes .c. chevaliers ki [soient][1] conreé ;
Si garderont le cors par si grant loiauté
Que il n’i [ait][2] tort fait ne nul estor meslé. »
Et cil li respondirent : « A vostre volenté. »
Cil ki furent à cort ont Renaut esgardé :
Baiart virent clochier, si l’ont asses gabé.
« Cil conquerra ancui, font il, le vif malfé.
Amis, aves vos ci vo ceval amené ?
Vos vaintrois bien le cors, se Dex l’a destiné. »
« Segnor, ce dist li rois, trop en avez parlé.
Gardes que par ramprones n’i ait mais mot soné. »
Mais de ce ot Renaus auques le cuer sené
Que de qanque il dirent, ne lor a mot soné.
Li jors fu biax et clers et la ravine grant ;[3]