Li palais fu là sus de sergens esnués.
Au dois se sunt asis que il i ont trovés.
Ja n’en leveront mais, si i seront plorés ;
Car dus Aymes lor peres estoit chacier alés
Entre lui et ses homes, ses drus et ses privés,
Sergens et veneors dont i avoit asses.
.iiii. cers avoit pris, dont molt s’est deportés ;
Ne set pas que Renaus soit o lui ostelés,
N’en sa cist de Dordone n’en son palais listés.
Richars et Aalars et Guichars li membrés,
Cil se sieent as tables belement, lés a lés ;
Mais n’est pas li mengiers ne pres ne conreés,
Lor mere[1] ist de la chambre, li uis fu desfermés,
Et si fil le regardent, s’ont les chiés enclinés.
« Aalars, dist Renaus, quel conseil me donnes ?
Vees la nostre mere, je la concis asses. »
« Frere, dist Aalars, por Deu, car i ales.
Contes li no [mesaise][2] et nos grans povretés. »
« Non fera, dist Richars li preus et l’alosés.
Sire Renaut, biau frere, encor vos atendes. »
Or sunt li .iiii. frere sus el palais plenier
Tant furent nu et povre, n’ont fil de drap entier.
Si sunt lait et hydeus, bien samblent aversier.
Quant la dame les voit, n’i ot k’esmerveillier ;
Tel paor ot eüe, ne se sot conseillier.
Mais or se rasseüre, ses prent à araisnier :
« Baron, dont iestes vos, nobile chevalier ?
Bien me sambles hermite ou gent peneancier.
Se vos voles del nostre, à celer nel vos quier,
De dras et de vitaille dont vos aves mestier,
Je vos en ferai ja de joie apareillier,
Por amor cel Seignor qui le mont doit jugier,
Qui garise mes fius de mort et d’encombrier.
Je [nes][3] vi, pecheresse, .x. ans ot en Fevrier. »
« Comment est ce donc, dame ? » dist Richars au vis fier.
« En la moie foi, sire, par mortel encombrier
