[Aliaumes les perçoit][1] entre lui et Henri :
« Jantis dus debonaires, par mon chief, vos les ci. »
Aymes les ot parler, s’en ot le cuer mari.
« Helas, ce dist li dus, con m’ont cist malbailli !
Se je lais ces glotons, puis que je les voi ci,
Parjuré sui vers Charle, ma foi li sui menti.
Dame Dex me confonde, se il en vont issi.
Las, pechieres, dolans ! por coi n’en sunt fuï ?
Ja en iert la bataille, je le sai tot de fi,
Et se mi fil i muerent, molt aurai cuer mari. »
« Sire, dist Hermenfrois, onques mais tel n’oï.
Dont ne l’aves vos Charle et juré et plevi,
Se vos les poes prendre, qu’il seront malbailli ?
Nus hom de vostre eage, qui le poil ait flori,
Ne se doit parjurer por fil ne por ami.
Et qui son seignor boise, bien a Deu relenqui. »
« Par mon chief, dist li dus, je vos ai bien oï.
Jamais n’i aront trives, orendroit les desfi. »
Quant Aimes ot ses fius en Ardane trovés,
.ii. chevaliers apele, des miels de ses privés :
« Baron, ales à eus et si les desfies. »
Et cil li respondirent : « Si com vos comendes. »
Des palefrois descendent, es chevaus sunt montés.
Cele part sunt venu ; chascuns tos aïrés ;
Et quant Renaus les vist, molt en est esfraés.
Il a dit à ses freres : « Baron, car vos armes.
Ci voi .ii.chevaliers venir tos abrivés.
Je ne sai que il vellent, ne ques est lor pensés,
Car d’Aimon nostre pere les vi orains sevrés.
Tant conois le vieilart et ses ruistes fiertés,
Par le mien essient, ja s’iert à nos meslés. »
« Certes, ce dist Guichars, vos dites verités.
Hom que l’on het de mort, n’iert ja aseürés. »
- ↑ 2964 L Haymes les aperçoit. A Aliames les persoit. B Aliaumes les persoit. C Alïaumes les voit. Michelant Naimes. Mais le duc est bien loin de là. — Comme pour l’épisode de Hervieus, je m’abstiens de donner ici des extraits de la version BC. L’on trouvera en appendice les parties les plus intéressantes de cette rédaction dont l’ampleur dépasse la mesure d’une note.