Là sunt nostre François desi à l’ajornant,
Et li duc et li conte vindrent au roi devant.
« Sire, quel la feromes ? dites vostre talant. »
« Baron, laisies l’enchaus, as maufes, le commant,
Chascuns voist en son regne, tot soion repairant.
Gardes bien le païs, jel vos pri et comant.
Se li glouton i entrent, preu soies et vaillant.
Tant les chacies par force qu’il soient recreant. »
Et cil li respondirent : « Tot à vostre commant. »
Or sunt monté li conte, n’i vont plus atarjant.
Li os est deslogié, si s’en tornent atant.
Charles vait à Paris qui le poil ot ferrant.
Et descent au perron, sos le pin verdoiant,
Et monte les degrés de vert marbre luisant.
As fenestres s’apoie, s’apela Foukerant,
Foukon de Moirillon et Richart le Normant.
« Baron, dist l’empereres, molt ai le cuer dolant
Des fius au viel Aymon qui si me vont menant.
Au chastel revendront, bien sai à esciant. »
« Sire, ce dist dus Names ja ne l’iront pensant,
Entré sunt en Ardane, en cele forest grant.
D’iluec iront avant où il auront garant, »
« Voire, dist Charlemaignes, as maufes les commant.
Ales, prendes Ogier et Richart le Normant,
Foucon de Morillon et Drivon de Guincent.
Congié doingnent François, si s’en tornent atant. »
Et cil li respondirent : « Tot à vostre commant. »
Or a nostre empereres son siege departi ;
Droitement vers Paris a son oire aquelli
Et li baron s’en sunt arriere reverti.
Chascuns vint en sa terre, molt en sunt esjoï,
Et Aimes s’en repaire qui le poil ot flori ;
Traverse la montaigne, si a le liu choisi
Et vint à la fontaine dont si fil sunt parti ;
Es osclos s’en entra, molt ot son cuer mari.
En Ardane s’en entre, s’a ses fius acueilli.
Deles .i. montaigne, sos .i. rochier flori,
Trova ses .iiii. fius qui preu sunt et hardi.
La nuit orent veillié, s’orent le jor dormi.
