Adonc se fu Renaus de dormir esveilliés.
Aallars s’escria : « Sainte Marie, aidies.
Ahi ! Renaut, biau frere, com iestes engingniés !
Hervix vos a traïs, li cuivers renoiés,
Et .c. de ceus de l’ost a ja [céans][1] poiés. »
Quant Renaus l’entendi, molt s’en est esmaiés.
Au plus tost que il pot, s’est vestus et chauciés,
Puis escrie ses freres : « Car vos apareillies. »
Dont s’armerent ensamble, s’ont les hiaumes laciés ;
Mais des Renaut n’i ot que .xx[x].[2] haubergiés.
Li autre sunt el borc, [chascun estoit colchiés,
Tuit ierent endormi][3] ce fu deus et pechiés.
Se Dame Dex n’en pense, chascuns iert destranchiés.
Renaus dit à ses freres : Seignor, ça vos traies ;
Se cist palais alume, ja n’en estordra piés. »
Et Hervix esperone les rues eslaisiés ;[4]
Cil qui sunt ovec lui ont les nus brans sachiés ;
Sus et jus et partot ont les ostex cerchiés ;
N’en truevent nul el lit qui ne soit destranciés.
.xxxv. chevalier sunt laiens destranchiés.
La vile est estormie et li cris enforciés.
Adonc fu li assaus merveilleus commenciés.
Là veïssies ces huis et ces ostex brisiés
Et ces haubers fausés et ces escus perciés,
Ces broines, ces haubers desros et desmailliés.
Le feu boutent es rues, si esprent li marchiés.
Sus el maistre palais se fu molt tost fichiés.
Et quant Renaus le voit, molt s’en est esmaiés.
- ↑ 2660 L a ja sus poiés. A a ja seans puiiés. M La grant ost Kllm. est chiens tout puiés. Mais on peut compléter avec Michelant : a ja là sus.
- ↑ 2665 L .xxv. M .iiii. chevaliers. A .xxx.
- ↑ 2666-2667 Hémistiches ajoutés d’après A où il y a couchiez. M Li autre sunt ou bourc et estoient couchiez. M omet d’ailleurs les quatre vers suivants.
- ↑ 2671-2675 Texte de A :
Et Hervix esperonne tout nu le branc d’acier.
Et cerche les ostès et devent et darrier,
N’an treuve nul dormant qui ne tranche le chief.
.xxxvi. chevaliers a les chiez rooignet.
