Arriere s’en repairent à esperon brochant.
Et Charles les enchauce, si lor vait escriant :
« Si m’aïst Dex, gloton, ja n’i aures garant.
Je vos ferai tos pendre à ce pui là devant. »
Renaus oï le roi, molt s’en va gramoiant.
Il a dit à ses freres : « Baron, ales avant.
Je voi le roi venir à esperon brochant.
Il nos menace à pendre de desor ce pui grant ;
Ja li donrai .i. cop de m’espée tranchant.
Se je le puis ocirre, joie en aurai molt grant. »
« Sire, dient li frere, laisies ester atant. »
Aelars le saisi par les reines devant ;
En lor chastel s’en entrent baut et lié et joiant,
Et Charles s’en repaire, tos plains de maltalant ;
Entre lui et Naimon molt ot le cuer dolant.
Li .iiii. frere furent sus el chastel au vant.
Or sunt li .iiii. frere en lor chastel entré
Et il et lor baron se sunt tot desarmé.
De lor prisons demainent grant joie et grant barné,
Et Renaus a son frere molt sovent mercié
Del conte d’Estanpois qu’il li a mort geté.
Et Charles tint son siege par vive poesté.
Seignor, ce sachies vos, que je di verité ;
Puis furent .xxx. mois acompli et passé,
Que onques ne se mut por vent ne por oré,
Et Renaus et si frere ne sunt si enserré
Qu’el bos et en riviere n’aient, lor volenté.
Molt chevaucent sovent, quant il lor vient à gré
Chaoier et arcoier parmi le bos ramé,
Et portent en riviere maint bon ostor mué.
Et l’ost fu d’autre part logié enmi le pré ;
Molt sovent et menu ont Renaut escrié,
Et li ber et si home sunt sor l’ewe aresté,
Et parole as François tot à sa volenté ;
L’uns dit sovent à l’autre et orguel et fierté.
Fouques de Morillon a Renaut apelé :
« Vasaus, molt estes fos, bien vos ai esprové,
Que vos contre Charlon aves chastel fermé.
Il ne vos laira mie en pais vostre ireté. »
