« Sire, dist-il au roi, quel merveille, ci a ?
Or laisons ce ester, je n’en parlerai ja ;
Mais de la mort mon oncle li parlemens sera,
Que feïstes ocire, dont malement vos va.
De lui vos demant droit par cel qui nos cria.
Mi honcle et li miens peres s’amainerent pieça ;
Mais endroit moi, dans roi, nel creanterai ja. »
L’empereres l’oï, forment s’en aïra ;
Il a levé son gant, Renaut feru en a
Si que li sans vermeus à la terre cola.
Comme Renaus le vit, arriere s’en torna,
Tres en mi liu la sale Bertolai encontra,
.i. eschekier a pris, durement l’en frapa ;
Les iex li fist voler et si l’escervela
Que tos mors enroidis à terre trebuça.
Estes vos la grant noise qui el palais monta.
Charles en jure Deu que mar se le pensa.
« Baron, prendes le moi, tantost pendus sera. »
Là commence meslée, de cou ne dotes ja.
Molt fu grans la meslée el palais principé ;
Le jor i ot maint cop et feru et doné,
Tant riche drap rompu et tant chevol tiré,
Tante bufe donée et tant baron frapé.
Renaus i fu lues pris, ne fust son parenté ;
Vers Charlon le tenserent qu’il ne fu mors jeté.
En dementres qu’il sunt el palais si troblé,
Renaus s’en est fuïs sor Baiart l’aduré,
Aalars et Guichars et Richars l’onoré.
De Paris se partirent, li vasal aduré ;
Jamais nes tenra Charles, si en sera iré.
Tant chevaucent li conte et itant sunt alé,
Qu’il vinrent à Dordon, là dont il furent né ;
Si troverent lor mere de cui il sunt amé ;
L’afaire li conterent comment il ont ovré.
Quant la dame l’oï, de dolor a ploré :
« Hélas, ce [lor] dist [ele], chaitif, meleüré,[1]
- ↑ 1962 Complété par Michelant qui a lu maleüré.
