Onques ne fu tel beste à bors ne à cités.
Et Renaus i monta, ne s’i est demorés.
L’escu pendi au col li vasaus adurés,
En sa main une lance, li fers fu acerés,
Et Charles l’empereres, li fors rois coronés,
Si adoba les autres que le vit ses barnés.
Haubers menus mailliés i ot le jor asses ;
Aalars et Guichars en ont .ii. endossés
Et Richars ensement, ne s’i est demores ;
Et les brans acerins pendent à lor costés ;
Grans esperons à or ont en lor pies posés.
Charles, li empereres, qui tant fu redotés,
Lor dona la colée, issi com vos oes.
Molt les a li rois Charles celui jor honorés.
Helas ! miols li venist qu’il les eüst tués,
Que par aus ot il puis grandes iniquités.
Li regnes d’environ en [fu][1] puis adolés ;
A tante gentil dame fu mors ses avoés
Et tans chevaliers mors, ocis et craventés ;
Et puis les jeta Charles trestos fors del regnés.
Huimais orres chançon de grans nobilités,
De grans chevaleries, de fors esters champés.
Ce fu à Pentecouste qu’est pleniers li estés,
Que li rois ot les freres de novel adobés
Et donés bons chevaus et espiez noelés.
Charles, li empereres, a François apelés :
« Baron, ce dist li rois, à moi en entendes.
Ales delivrement, la quintaine leves ;
Si i ferons joster nos noviaus adobés.
Verrons com i ferront des espiés noelés. »
Et cil ont respondu : « Volentiers et de grés. »
De Paris sont parti, sor Saine vont es prés.
La quintaine ont levée par le commant Charlon ;
De Paris sunt parti trestot li haut baron,
Li grant et li petit dont i ot à fuison ;
.vii. rois i ot le jor, si com lissant trovon.
Sor Baiart chevauça Renaus, li fiuz Aimon,
- ↑ 1835 Fu manque au ms.
