Atant parti des rens dus Bueves l’alossé,
Et escrie : « Aigremont ! Charles, où ies alé ?
Mon neveu m’as ocis, que tant avoie amé.
Jamais ne serai liés, si l’auras comparé. »
Charlemaignes l’oï[1], si s’est des rens sevré,
« Or en soit Dex au droit, dist Bueves l’aduré. »
« Certes, ce dist li rois, ja te sera monstré
Que oceïs mon fil com traïtres prové. »
Le cheval laise corre, par aïr l’a hurté
Et a brandi la hante dont li fers fu quarré,
Et li dus contre lui ne l’a pas refussé.
Grant cos se sunt doné en lor escus listé ;
Desous les boucles d’or les ont frais et quassé.
Fort furent li hauberc, quant il ne sunt fausé,
Et li cheval se sunt durement encontré
Que sor les rains derrière se sont acatoné.
Ambedui li vasal sunt à terre versé.
Charles resailli sus, li bons roi coroné,
Et a traite l’espée qui li pent au costé
Et vait ferir Buevon parmi l’iaume gemé,
Que les flors et les pieres en a jus craventé ;
Mais li hiaumes fu fors, ne l’a mie entamé.
Le brans glaça aval du senestre costé ;
.c., et .l. mailles a de l’auberc copé
Et le vasal avoit .i. petitet navré.
L’esperon à fin or li a del pié osté :
Desi que en la terre n’est li brans aresté.
Dame Dex le gari par la suie bonté.
Non porquant si l’a il del cop si estoné,
Par force le covint agenoillier el pré ;
Mais tost resailli sus li vasal honoré,
Et a traite l’espée dont li brans fu letré.
Li bons dus d’Aigremont sus resailli errant,
Dolans fu li bons dus, quant à veü son sanc ;
Se vengier ne se puet, ja se tenra por lent.
Il vait ferir le roi sor son hiaume luisant ;
Le cercle li copa ki fu fors et tenant ;
- ↑ 1285 L. Klon l’oï.
