Molt fu vasaus as armes et de grande bonté.
L’empereres le fiert en son escu listé,
Desos la bocle à or li avoit estroé
Et l’auberc de son dos derot et desafré,
Si que par mi le cors li a l’acier passé.
Mort l’avoit abatu tres en miliu del pré.
« Outre, dist il, cuivers, vos aves comparé
La mort de mon chier fil que tant avoie amé. »
Puis escrie : « Monjoie ! feres i, mi privé.
Que Bueves soit ocis et à honte livré. »
Et il si font tantost que n’i sunt demoré.
Là veïssies estor et grant mortalité,
Tant vaillant chevalier à la terre versé
Qui jamais à nul jor ne seront restoré.
Là poïssies veoir tant home esboelé,
Tant vaillant chevaliers ocis et craventé,
Qui puis ne vit sa feme na tot son parenté.[1]
« Sainte Marie [Dame], dist Girars l’onoré,[2]
Garissies hui mon cors, que ne soie afolé,
Que ne me prende Charles, li fors rois coroné,
Ne moi ne mes .iii. freres que je ai tant amé. »
Dont a brandie l’anste, s’a le cheval hurté
Et fiert .i. home Ogier en son escu listé,
Que tot li a fendu et, tot escartelé,
Et le haubert del dos li avoit lues fausé.
Li fers contre l’acier a molt petit duré ;
Parmi le gros del cuer li esl l’acier passé ;
Mort l’avoit abatu du destrier sejorné,
Puis crie : « Rossillon ! cist a son tens finé. »
Atant es vos sa gent qui n’i sunt demoré ;
Es gens le roi se fierent, n’i ont plus aresté.
A icele envaïe ont feru et chaplé.
Li estors fu pesans, tant cop i ot doné,
Tans hom il fu le jor parmi le cors navré,
Et de .ii. pars i fu molt grande la fierté.
Page:Castets - La Chanson des quatre fils Aymon, 1909.djvu/325
Cette page a été validée par deux contributeurs.
313
les quatre fils aymon
