Karles fu a Paris en sa maistre maison,
Mult i fu grans la cors des chevaliers barons,
Onques ne tint gregnor que de fi le savons.
Tuit i furent venu si prince de renons,
Salemons de Bretaigne, del Mans li quens Huon,
Et Yves et Yvoires, Berengiers et Haston,
Et Hernaus de Biaulande, Galerans de Buillon,
Et tant prince et tant dus dont jo ne sai le nom.
La cors fu mult pleniere de chevaliers barons ;
Asses i ot venu Alemans et Frisons,
Et Engles et Normans, Poitevins et Bretons,
Lombart et Berruier i vindrent de randon.
A la cort est venus dus Aymes de Dordon
Et avec lui si fil qui sunt de grant renon,
Tuit .iiii. sont vaslet, n’ont barbé ne grenon,
Li dux les ama mult et si avoit raison.
Karlesmaines se lieve, si parla a haut ton :
« Baron, ce dist li rois, entendes ma raison.
Tante terre ai conquise et tante region
Dont li segnor me servent, ou il vellent ou non ;
Et tante rice vile ai fait metre a charbon
Et tant paien aurai mis a destruction,
Et la sainte loi Deu par tot mis i avons ;
Je conquis Guiteclin, icel Sesne felon,
En Saisone le grant que nos ore tenom ;
La perdi Bauduin que nos tant amion ;
N’i degnierent venir mi chevalier baron,
Fors li dux des Normans et li rois Salemons.
Par icex de Herupe ou jo salvassion[1].
N’i eüssons conquis qui valsist .i. bouton,
Se ne fust Salemons qui vint a esperons ;
O tos .xxx.m homes me secorut par nom.
Li dux Bues d’Aigremont n’i fu pas, ce set on,
Lambers li Berruiers ne Lohaus li Frisons
Ne Gaiffiers de Bordele qui tient grant region ;
Jo mandai en aïde Girart de Rosellon
- ↑ L’Arsenal passe ce vers important que donne Montpellier, si abrégé qu’il soit, avec l’orthographe « hu ge salvation. »
