Qu’oultre mer passera a nef et a dromon,
Si venra guerroier l’empereür Karlon.
Segneur, il ce dist voir, que vous celeroit on ?
Il arriva en Franche avec maint hault baron.
Ogier fu aveuc li et le bon duc Naymon
Et tout sen grant linage de Franche le royon,
Et assiga rois Karles tout droit à Montlaon.
Tant greverent le roy et firent cuisenchon
Qu’il se rendi a iaulx et fist acordizon
Et vient au tref Yvon faire amendassion,
Et dist qu’il voloit avoir pais au noble roy Yvon.
Droit là firent le pais li duy roi a bandon
Et baizerent l’un l’autre d’umble condicion,
Voire par tel convent et par tele occoison
Que rois Karles fist faire un moustier bel et bon
En tel plache ou li frere Regnaut le bon baron,
Et si fut aveuc yaux Maugis, chieux d’Aigremon.
En celle esglise là furent mis li baron,
Si furent eslevé en fiertre d’or sans laiton
Car il furent sainti au voloir de Jhesum.
Et apres chela fait, signeur, que nous dizon ?
Karles rendi se terre au noble roy Yvon,
Yvon le releva du riche roy Karlon.
Charles fist moult grant feste au noble roy Yvon
Et disnerent ensamble par dedens Monlaon
Et tout le grant barnage entour et environ.
· · · · · · · · nt apres disner le noble roy Yvon
[Dut p]rendere congiet au roy de Monlaon
Et a tout sen linage entour et environ
Et au bon duc Rolant, Olivier le baron.
Charles et tout li aultres de bonne opinion
L’ont tous [re]commandé au disgne roy Jhesum.
Yvon s’en departi avec maint hault baron
Et est entrés es nés, les voilles drecha on.
Tant on singlé par mer a Dieu beneïchon,
K’a Jherusalem sont arivé li dromon.
Roys Yvon et li aultres dessendent ou sablon.
Ivon si s’en ala en son palais de non,
Aveuc li maint princhier et chevalier baron.
Page:Castets - La Chanson des quatre fils Aymon, 1909.djvu/253
Le texte de cette page a été corrigé et est conforme au fac-similé.
241
les quatre fils aymon
