Oncles, se dist Rolant, bien en saray penser.
Quant Maugis les entent, donc s’ala adviser
D’un conjurement faire dont bien savoit user.
Adonc va tous les diables esramment conjurer
Et par parolles fist ces kaines deffermer.
Karle les ouï bien cheïr et avaller
Et ossi fist Rolant qui tost s’ala lever.
Et Maugis prinst son carme tantost a retourner.
Un conjurement fist et puis prinst a soufler.
Lors se laissa le roy a la terre verser,
Et trestout li baron ne se porent ester.
A peu que ne les fist trestous escerveler,
Si fort sont enchanté sans yaux a remuer.
N’y a celui qui puist ne piet ne main tyrer.
Et quant Maugis les vist, si print joye a mener.
Il vient devant Karlon, se li prinst a crier :
Karle, je ne veulz mie c’on me puist reprouchier
Que je soie partis de vo tref sans parler.
Je prens congiet a vous, car il m’en fault aler.
Karle l’entendy bien, mais ne pot mot sonner.
Karlles, ce dist Maugis au courage certain,
Vous m’avez fait ennoy, droit est se je m’en plain :
J’ay [eu] en ceste nuit en vo maison grant fain.
Vous ne m’avez donné ne chair ne vin ne pain.
Mais par celui Signeur qui d’Adam fist Evain,
Je le vous meriray avant qu’il soit demain,
Car trop m’avais meffait dont je vous tiens vilain,
Et a Regnault ossi, le mien cousin germain.
Or oyes de Maugis, pour Dieu le souverain.
A Karlon est venus qu’il n’ammoit adonc grain,
Joyeuse lui deschaint de son lez senestrain ;
Et puis vient a Rolant qui estoit mat et vain.
Durendal li deschaint qui d’or valoit tout plain.
Rolant ne pot mot dire, s’en avoit dueil grevain.
Maugis dist en riant : Rolant, par saint Germain,
Je sui vous escuiers, l’espée vous deschain.
Apres au duc Ogier ala oster Courtain
Et l’espée Olivier qui fu le frere Audain ;
A Naymon et aux aultres qui li furent prochain
Page:Castets - La Chanson des quatre fils Aymon, 1909.djvu/205
Cette page a été validée par deux contributeurs.
193
les quatre fils aymon
