Comment as tu en non ? ne le me celez ja.
Et tes frere(s) ensement ou tant de biauté a ?
Et Regnault respondi : Et on le vous dira.
On me nomma Regnault quant on me baptisa.
Cest aultre a non Alart et Guichart par de sa.
Richart a non cel autre qui est au lez de la.
Duc Aymon nostre pere l’autrier nous commanda
Que venissiens a court et moult vous supplia
Que nous adoubissies au jour qu’il vous plaira
Pour le plus vaillant roy qui jamais n’estera.
Amis, ce dit li rois, par Dieu qui tout crea,
Lies sui quant je vous voy en mon palais de sa.
Dimenche, au bel matin, que mon corps court tenra,
Vous feray chevaliers, ne vous en doubtez ja.
Sire, ce dist Regnault, ja il ne m’avendra
Que soie fait le jour que Dieu se reposa,
Mais lundi, s’il vous plaist, on le rechevera.
Quant Charles entendi de Regnault la raison,
Si li a respondu : Par ma foy, danzillon,
Chevalier vous ferai a vo devision.
Lors fu temps de diner, seoir vont li baron.
Devant l’emperuer qui tant ot de renon,
Servirent noblement li .iiii. fils Aymon.
Noblement sont vestu comme filz a baron,
Cotes de soye a or ouvrée a oysillon,
Leurs cheveulx reluisoient com penne de paon.
Et Charle les regarde d’unble condicion,
Et a dist haultement, que bien l’entendist on :
Cil venront a grant bien, se il font le mien bon.
De ce furent dolent li parent Guenelon,
Mais joyant en estoient cil de l’estracion,
Ogier de Dannemarche, Estoit le filz Odon,
L’arcevesques Turpin et le bon duc Naymon,
Regnier de Vantamize et Gautier de Digon,
Thierri li Ardenois, Gherars de Rosillon
Salemon de Bretengnie et de Nantueil Doon.
Ne sai que vous fesisse eslongier la chansson.
La liste des barons de la gent loyale, parents des Fils
