Ains atenderons anchois tant c’ait a nous parlé,
Savoir s’elle nous a de nient avisé.
Or sont li .IIII. frere sus el palais plenier.
Tant sont et povre et nu, n’ont fil de drap entier.
Les chars orent plus noires que meure de meurier.
La ducoise les voit, n’i ot qu’esmerveillier.
Tel paor ot la dame, ne [se] sot conseillier.
Talent ot qu’en sa cambre se coureüst muchier,
Mais or se rasseüre, ses prist a arainier :
Baron, dont estes vous ? ne me deves noier.
Se vous voles du nostre, s’en ares volentiers,
De dras et de vitaille, se en aves mestier,
Je vous en ferai ja assez apareillier
Pour l’amour chel Seigneur qui tout a a jugier,
Qui garisse mes fix de mort et d’encombrier.
Jou nes vi de mes iex .XV. ans a tous entier.
........................................
Quant Renaus l’entendi, si s’en va embronchier.
La ducoise le voit, si prent a arainier,
Tous li sans desous li commenche a refroidier.
La ducoise se dreche tout droit en son estant
Et voit muer Renaut le chiere et le samblant.
Il avoit une plaie enmi le vis devant.
Sa mere le regarde, si le va ravisant,
Devers li se tourna, si li dist a itant :
Renaut, se tu es chou, pour coi le vas chelant ?
Biaus fiex, je te conjur de Diu le roy amant,
De toutes les vertus ou nous sommez creant,
Que se tu es Renaus, ne me choilez noiant :
Moult le me dist mes cuers, ne sai se il me ment.
Quant Renaus l’entendi, si pleure tenrement :
Il ne s’en tenist mie pour plain .I. val d’argent.
La ducoise le voit, si connu son enfant.
Plourant, brache levée, le va baisier atant.
Parmi la mestre porte sont a Dordonne entrez,
Mais il n’i furent oncques conus ne ravisez.
Moult en ont mervillé cilz ques ont esgardés
Et dient l’uns a l’autre : Ou furent cilz trové ?
