La duchesse raconte la mort de Bertolai et les faits qui en ont été la suite :
Qand Renaut l’entendi, prist soi a embronzier.
La duçouse l’esgarde, prist le a areisnier ;
Tot le sanc desus lui li prist a formier.
La duzoise se drece el paleis en estant
Et vit muer Renaut son vis et son semblant.
Il avoit une playe enz el vis de devant,
Au beort li fu fete, quant [i]l estoit enfant.
Sa mere l’a veü, si le va ravissant.
Devers lui se torna, si li dist maintenant :
Renaut, dist la duchoise au corage vaillant,
Bel filz, es tu donc chen ? por quoi le vas celant ?
La duzoise l’esgarde, si le va ravissant,
Plorant, brace levée, va baissier son enfant.
Voici le texte parallèle de B. J’ai averti du développement particulier qui le caractérise.
Parmi la maistre porte sont en la ville entré,
Mais ains n’i furent [il] connu ne avisé.
Moult s’esmerveillent tout chil de la chité
Et dient l’un à l’autre : Ou furent chil trouvé ?
Par le mien ensient ch’est de la gent Fourré,
Ou che sont anemi ou diable ou maufé,
Que sont ensi desrout, noirchi et descarné.
Boin marchié a de bos la ou il ont esté,
Car lor cheval en sort estroitement chenglé.
Les venredis de l’an ont, je quit, jeüné,
Que moult lor sont delié li flanc et li costé.
De maintes gens estoient escarni et gabé.
Renaus a tout oï, s’a Guichart appelé.
Frere, dist-il, moult a mal plait en povreté,
Moult nous ont chil vilain escarni et gabé.
Frere, che dist Guichars, je l’ai bien esprouvé.
Il le comperront ja, par ma crestienté.
Lor a geté le main au boin branc acheré.
Ja se ferist entr’aus a guise de sengler,
Quant sez frerez Renaus l’a arriere bouté.
