Meïsmez Karlesmaignes va apres de randon
Sor Ferrant d’Alemagne qui va comme faucon.
Et li vassal s’en vont a coite d’esperon.
De la chace le roi ne dotient .I. boton.
Enfreci a Senliz ne font arestison.
Oiez quele aventure avint as filz Aimon.
Lor cheval estancierent, ne valent .I. boton,
Mes a Baiart ne puet nus metre l’esperon.
Quant Renaus voit ses freres remanoir el sablon,
Hé las ! ce dit li ber, coment nous contenron ?
Se mes freres i laiz, ja n’ait m’ame pardon.
Aalart apella, si l’a mis a reson.
Or tost, fet il, biaus frere, montez tost de randon,
Et Richars a Guichars deriere en chevauçon,
Car bien nos portera Baiarz li arragon.
Et cil ont respondu : Se Deu plest, nous feron.
Ez vos parmi la plaigne, bessié le confanon,
.I. chevalier poignant qui ot a non Huon ;
Sire fu de Perone et si tenoit Mascon ;
Et escria Renaut : Ne la garrez, gloton !
Mar i avez occiz Bertholai le baron.
Karles vos en rendra moult mortel guerredon.
Renaus dit a ses freres : Car alez juz, baron.
Se Dex le me consent, cheval gaeigneron.
Dont lesse aler Renaus li filz au viel Aimon,
Vait ferir en l’escu le preu conte Huon :
Tant com hante li dure, l’abat mort el sablon.
Le cheval ala prendre qui va comme faucon ;
Aalart le bailla par le doré arçon,
Et cil i est montez cui qu’en poist ne qui non,
Et Richars et Guichars sor Baiart l’arragon.
Or s’en tornent li frere qui qu’en poist ne qui non,
Hui mes ne dotent il l’empereor Karlon.
Quant Baiarz se senti si chargiez des baron,
Il a bessié la coe et escout le crepon,
Adont ne se tenist a lui esmerillon.
Il trespassa les terres et les vaux a bandon.
Onques ne s’aresterent jusqu’el val de Soisson.
La nuiz est parvenue, si remaint rois Karlon.
Page:Castets - La Chanson des quatre fils Aymon, 1909.djvu/160
Cette page a été validée par deux contributeurs.
148
les quatre fils aymon
