homme ad fait à meisné et as soens il quitera et lessera à l’eisné tout le droit q’il ad ou peut avoir en la corone, et tant pur l’un droit come pur l’autre lui meisné conoistra lui aisné seignur soverain de ycele et en ferra hommage lui meisnés au terme qe serra ordoné par lui et par son piere, et ce meisme ferront tout chil qi se tenront pur le meisné et qui faire le devent, ou lui meisnés les tendra pur rebealx et pur enemis.
Et est l’entencion qe lui deux seignurs serviront et aideront l’un à l’autre à leur coust et à leur freit en conquerant tout ce qe à chescun appartient, et conqueront primerement Normandie pur le meisné, et de là treiront à Paris selonc ce qe semblera bon à l’eisné.
Et est acordée en bone foi qe à paiis ne as amis de meisné ne serra porté aucun damage par l’eisné, ne par ses gentz.
Item, qe ou cas qe lui meisné trespasseroit sanz heir de son corps avant qe toutes cestes choses serront faites et acomplies, et tout ce fait serra mis ou second frère du meisnés, et si lui second trespassoit sans heir de son corps serra mis à tierz frère, tout ensi come il est dit pur l’aisnés.
Item, qe ou cas qe les amis ou alliez, servitours ou autres eidantz de meisnés prendroient aucun damage pur son service et pur tenir sa partie, soit de terres, rentes ou autres biens et choses, l’eisné le lour rendra de la conqueste q’il ferra, et si tost come il avera conquis cose seante et proschaine à eux.
