Adieu, ne penſez plus que l’on vous faſſe tort,
Et ne regardez point plus haut que voſtre ſort.
Scène troisieſme.
aiſons-nous, il le faut, & mon maiſtre l’ordonne,
« Heureux qui n’a de loy que celle qu’il ſe donne,
Dont toujours la fortune eſt en un meſme point,
Qui ne fut jamais haut, ou qui ne tombe point ! »
Pourquoy faut-il ſervir deux puiſſances pour une
Eſclave de l’Amour comme de la Fortune ?
Cruel commandement de l’ingrat que je ſers !
Je n’oſe témoigner que je cheris mes fers,
Quoy que j’en ſois jalouſe en une telle ſorte
Que je ne puis ſouffrir qu’autre que moy les porte :
Bien, mon cœur, qu’il s’engage à de nouveaux apas,
Crains pour luy ſeulement, mais ne murmure pas,
Songe qu’il ſe ruine, & non pas qu’il t’offence,
Ne plains que ſon malheur, ſouffre ſon inconſtance :
Il n’eſt point de malheur qui ſoit égal au mien,
Je crains plus toutefois les preſages du ſien,
Aux ſacrez inteſtins des victimes plus pures
Je voy d’un accident les ſiniſtres augures,
