suyvit la parole, veu que, en ung moment où ses gens les laissèrent, il amignotta la belle fille, qui cuydoyt luy veoir tirer beaulx deniers de sa bougette et n’osoyt resguarder à la bougette en fille honteuse de recepvoir salaire disant : Ce sera pour la prime foys.
— Ce sera tost, feit-il.
Aulcuns disent que il eut mille poines à la forcer et la força petitement ; aulcuns la tinrent pour mal forcée, pour ce que elle yssit comme une armée aval de route, se respandit en plainctes et querimonies, et vint chez le iuge. Par adventure, mon dict iuge estoyt ez champs. La Portillonne attendit son retourner en la salle, plourant, disant à la servante que elle avoyt esté volée, pour ce que monseigneur du Fou ne luy avoyt rien baillé aultre que sa meschanceté, tandis que ung chanoine du Chapitre souloyt luy donner grosses sommes de ce que luy avoyt robbé monseigneur du Fou ; si elle aymoyt ung homme, elle existimeroyt saige de luy bailler ceste ioye pour ce que elle y prendroyt plaisir ; ains le chamberlan l’avoyt hodée, hoguinée, et non mignottée gentement comme elle cuydoyt l’estre, partant il luy debvoyt les mille escuz du chanoine. Le iuge rentre, veoit la belle fille et veult noiser, ains elle se met en guarde et dict que elle est venue pour faire une plaincte. Le iuge luy respond que pour le seur il y aura ung pendu de sa fasson, si elle le soubhaite, pour ce que il est en raige de faire les cent ung coups pour elle. La belle fille luy dict que elle ne veult point que son homme meure, ains que il luy paye mille escuz d’or, pour ce que elle est contre son gré forcée.
— Ha ! ha ! feit le iuge, ceste fleur vault davantaige.
— A mille escuz, feit-elle, ie le quitte, pour ce que ie vivray sans faire mes buées.
— Cil qui ha prins ceste ioye est-il fourny de deniers ? demanda le iuge.
— Oh ! bien.
— Doncques il payera chier. Qui est-ce ?
— Monseigneur du Fou.
— Voilà qui change la cause, dit le iuge.
— Et la iustice ? feit-elle.
— I’ay dict la cause, et non la iustice, repartit le iuge. Besoing est de bien sçavoir comment eut lieu le cas.
Lors la belle fille raconta naïfvement comment elle rangioyt
